രണ്ട് ഇരട്ട സീറ്റ് തേജസ് വിമാനങ്ങൾ കൂടി വ്യോമസേനയ്ക്ക്

ബെംഗളൂരു: ഹിന്ദുസ്ഥാൻ എയ്റോനോട്ടിക്സ് ലിമിറ്റഡ് (HAL) വികസിപ്പിച്ച രണ്ട് തേജസ് എംകെ-1 ഇരട്ടസീറ്റ് പരിശീലന വിമാനങ്ങൾ കൂടി ഇന്ത്യൻ വ്യോമസേനയ്ക്ക് കൈമാറി. ഇതോടെ കരാർ പ്രകാരമുള്ള 40 തേജസ് എംകെ-1 വിമാനങ്ങളുടെ കൈമാറ്റം പൂർത്തിയായി. ബെംഗളൂരുവിൽ നടന്ന ചടങ്ങിലാണ് വിമാനങ്ങൾ കൈമാറിയത്. പ്രതിരോധമന്ത്രി രാജ്നാഥ് സിങ്, കേന്ദ്ര വ്യോമയാനമന്ത്രി കെ. രാംമോഹൻ നായിഡു എന്നിവരുടെ സാന്നിധ്യത്തിലായിരുന്നു ചടങ്ങ്. ഇവ LCA Tejas Final Operational Clearance (FOC) Twin-Seater Trainer വിഭാഗത്തിൽപ്പെട്ട വിമാനങ്ങളാണ്. യുദ്ധവിമാന പൈലറ്റുമാരുടെ പരിശീലനത്തിനായി പ്രധാനമായും ഉപയോഗിക്കുന്ന ഇരട്ടസീറ്റ് പതിപ്പാണിത്. FOC കരാറിന് കീഴിൽ കൈമാറേണ്ട അവസാന രണ്ട് പരിശീലന വിമാനങ്ങളാണ് ഇപ്പോൾ വ്യോമസേനയ്ക്ക് ലഭിച്ചത്. ഇതിനൊപ്പം മൂന്ന് HTT-40 അടിസ്ഥാന പരിശീലന വിമാനങ്ങളും വ്യോമസേനയ്ക്ക് കൈമാറി. HTT-40ന്റെ 70 വിമാനങ്ങൾക്കുള്ള കരാറിലെ ആദ്യ കൈമാറ്റമാണിത്. പ്രാഥമിക വ്യോമപരിശീലന ആവശ്യങ്ങൾക്കായാണ് HTT-40 പ്രധാനമായും ഉപയോഗിക്കുക. സിവിൽ വ്യോമയാന മേഖലയിലും ചടങ്ങ് ശ്രദ്ധേയമായി. നാല് ധ്രുവ് എൻജി (Dhruv NG) ഹെലികോപ്റ്ററുകൾ പവൻ ഹാൻസ് ലിമിറ്റഡിനും കൈമാറി. മെഡിക്കൽ ആംബുലൻസ്, വിഐപി യാത്ര, വിനോദസഞ്ചാരം തുടങ്ങിയ സിവിൽ ആവശ്യങ്ങൾക്ക് ഇവ ഉപയോഗിക്കാനാകും. ഇന്ത്യയിൽ തന്നെ രൂപകൽപ്പന ചെയ്ത് വികസിപ്പിക്കുകയും നിർമിക്കുകയും ചെയ്യുന്ന വിമാനങ്ങളുടെയും ഹെലികോപ്റ്ററുകളുടെയും ശേഷി വർധിക്കുന്നതിന്റെ ഭാഗമായാണ് ഈ കൈമാറ്റങ്ങളെ പ്രതിരോധ മന്ത്രാലയം വിലയിരുത്തുന്നത്. വിദേശ ആശ്രിതത്വം കുറയ്ക്കുന്നതിനും ആഭ്യന്തര വ്യോമയാന-പ്രതിരോധ വ്യവസായത്തെ ശക്തിപ്പെടുത്തുന്നതിനുമുള്ള നടപടികളുടെ ഭാഗമായാണ് പദ്ധതിയെ മന്ത്രാലയം അവതരിപ്പിച്ചത്.