കൊച്ചി: ഭാവിയിൽ ഗർഭധാരണത്തിനുള്ള സാധ്യത നിലനിർത്തുന്നതിനായി എഗ് ഫ്രീസിങ് നടത്തിയെന്ന് നടി സുരഭി ലക്ഷ്മി. ജീവിതത്തിൽ കുറച്ചുകൂടി നേരത്തെ എടുക്കേണ്ടിയിരുന്ന തീരുമാനമായിരുന്നു ഇതെന്നും, ശരിയായ പങ്കാളി ജീവിതത്തിലേക്ക് എത്തുമെന്ന പ്രതീക്ഷയിൽ തീരുമാനം നീണ്ടുപോയതാണെന്നും സുരഭി വ്യക്തമാക്കി.
സോഷ്യൽ മീഡിയയിൽ പങ്കുവച്ച വീഡിയോയിലൂടെയാണ് സുരഭി തന്റെ അനുഭവം തുറന്നുപറഞ്ഞത്. ഇരുപതുകളുടെ അവസാനത്തിലോ മുപ്പതുകളുടെ തുടക്കത്തിലോ തന്നെ ഈ തീരുമാനം എടുക്കേണ്ടിയിരുന്നുവെന്നാണ് നടിയുടെ അഭിപ്രായം. ഏറെക്കാലമായി എഗ് ഫ്രീസിങ് ചെയ്യണമെന്ന് ആഗ്രഹിച്ചിരുന്നെങ്കിലും തീരുമാനം വൈകുകയായിരുന്നുവെന്നും അവർ പറഞ്ഞു.
താൻ നടപടിക്രമം പൂർത്തിയാക്കിയ ശേഷമാണ് അനുഭവം തുറന്നുപറയുന്നതെന്നും, നടപടിക്രമം എങ്ങനെയായിരുന്നു, ആ സമയത്ത് എന്താണ് അനുഭവപ്പെട്ടത് തുടങ്ങിയ കാര്യങ്ങൾ നേരിട്ട് പങ്കുവെക്കാൻ കഴിയുന്ന സാഹചര്യത്തിലാണ് ഇപ്പോഴുള്ളതെന്നും സുരഭി പറഞ്ഞു. ജീവിതത്തിൽ എടുത്ത ഏറ്റവും വലിയ തീരുമാനങ്ങളിലൊന്നായാണ് ഇതിനെ കാണുന്നതെന്നും അവർ വ്യക്തമാക്കി.
കാൻസർ പോലുള്ള രോഗങ്ങൾക്ക് ചികിത്സ ആരംഭിക്കുന്നതിന് മുമ്പ് ഭാവിയിലെ ഗർഭധാരണ സാധ്യത സംരക്ഷിക്കുന്നതിനായി എഗ് ഫ്രീസിങ് ഉപയോഗിക്കാറുണ്ടെന്നും, ഗർഭധാരണം വൈകിപ്പിക്കാൻ ആഗ്രഹിക്കുന്നവർക്കും ഇത് പരിഗണിക്കാവുന്ന മാർഗമാണെന്നും സുരഭി പറഞ്ഞു. എന്നാൽ എഗ് ഫ്രീസിങ് ഭാവിയിൽ ഗർഭധാരണം ഉറപ്പാക്കുന്ന നടപടിയല്ല; പ്രായം ഉൾപ്പെടെയുള്ള വിവിധ ഘടകങ്ങൾ ഫലത്തെ സ്വാധീനിക്കും എന്നതാണ് മെഡിക്കൽമായി ശ്രദ്ധിക്കേണ്ട കാര്യം.
തന്റെ അനുഭവം പങ്കുവെക്കുന്നതിലൂടെ മറ്റൊരാൾക്ക് ശരിയായ സമയത്ത് തീരുമാനമെടുക്കാൻ പ്രചോദനമാകുമെന്നാണ് പ്രതീക്ഷയെന്നും സുരഭി പറഞ്ഞു. നടപടിക്രമത്തിന് പിന്തുണ നൽകിയ ഡോ. അശ്വതി കുമാരനും കോട്ടക്കൽ ആസ്റ്റർ മിംസിലെ ബന്ധപ്പെട്ട ഐവിഎഫ് സംഘത്തിനും നടി നന്ദി അറിയിച്ചു.
വ്യക്തിജീവിതത്തിലെ തീരുമാനങ്ങളെക്കുറിച്ച് തുറന്നുപറയുന്നതിലൂടെ, ഗർഭധാരണം വൈകിപ്പിക്കുന്നതുമായി ബന്ധപ്പെട്ട് സ്ത്രീകൾക്കിടയിൽ ചർച്ച ചെയ്യപ്പെടുന്ന ഒരു വിഷയത്തിലേക്കാണ് സുരഭി ലക്ഷ്മിയുടെ വെളിപ്പെടുത്തൽ ശ്രദ്ധ തിരിക്കുന്നത്.