തിരുവനന്തപുരം: കേരള സംസ്ഥാന ചലച്ചിത്ര അക്കാദമിയുടെ പുതിയ ചെയർമാനായി പ്രമുഖ മലയാളം-തമിഴ് നടനും ഫിലിം ഫെസ്റ്റിവൽ ക്യൂറേറ്ററുമായ രവീന്ദ്രനെ സർക്കാർ നിയോഗിച്ചു. സിനിമയുടെ കലാപരവും സാങ്കേതികവുമായ മേഖലകൾക്ക് കൂടുതൽ പ്രാധാന്യം നൽകുന്ന പ്രവർത്തനങ്ങൾക്ക് രവീന്ദ്രന്റെ നേതൃത്വത്തിൽ അക്കാദമി ഊന്നൽ നൽകുമെന്നാണ് പ്രതീക്ഷിക്കുന്നത്.
പ്രശസ്ത നടിയും സാംസ്കാരിക പ്രവർത്തകയുമായ പ്രിയങ്ക നായരെ അക്കാദമിയുടെ വൈസ് ചെയർപേഴ്സണായും നിയമിച്ചു. നടൻ സലിം ഹസ്സൻ, യുവ സംവിധായകൻ ജോഫിൻ ടി. ചാക്കോ എന്നിവർ എക്സിക്യൂട്ടീവ് കമ്മിറ്റി അംഗങ്ങളാകും.
അതേസമയം, അക്കാദമിയുടെ ജനറൽ കൗൺസിലും പുനഃസംഘടിപ്പിച്ചു. ദീപു കരുണാകരൻ, വൈക്കം വിജയലക്ഷ്മി, എം.വി. ഗിരീഷ്കുമാർ, സലിം ഹസ്സൻ, ബി. രാകേഷ്, സജീവൻ അന്തിക്കാട്, ജോഫിൻ ടി. ചാക്കോ, സക്കരിയ, ആർ.എസ്. പണിക്കർ, ധർമ്മജൻ ബോൾഗാട്ടി, വാഴൂർ ജോസ്, എ. കബീർ, സാബു ശങ്കർ, ഷെർഗ സന്ദീപ്, അബ്ദുൾ ഹനാൻ എന്നിവരെയാണ് ജനറൽ കൗൺസിലിൽ ഉൾപ്പെടുത്തിയിരിക്കുന്നത്.
പുതിയ നേതൃത്വവും കൗൺസിലും ചുമതലയേൽക്കുന്നതോടെ കേരളത്തിലെ സിനിമാ പ്രവർത്തനങ്ങൾക്കും ചലച്ചിത്ര മേളകൾക്കും അക്കാദമിയുടെ വിവിധ സാംസ്കാരിക ഇടപെടലുകൾക്കും പുതിയ ദിശ ലഭിക്കുമെന്നാണ് വിലയിരുത്തൽ.