LPG സിലിണ്ടർ ബുക്കിങ്ങിൽ ആശ്വാസം; ഇനി 25 ദിവസത്തിന് ശേഷം വീണ്ടും ബുക്ക് ചെയ്യാം

ന്യൂഡൽഹി: പാചകവാതക ഉപഭോക്താക്കൾക്ക് ആശ്വാസമായി എൽപിജി സിലിണ്ടർ റീഫിൽ ബുക്കിങ്ങിലെ നിയന്ത്രണങ്ങളിൽ ഇളവ്. ഇനി ഗ്രാമ-നഗര വ്യത്യാസമില്ലാതെ എല്ലാ ഗാർഹിക എൽപിജി ഉപഭോക്താക്കൾക്കും 25 ദിവസത്തിന് ശേഷം വീണ്ടും സിലിണ്ടർ ബുക്ക് ചെയ്യാം. കേന്ദ്ര പെട്രോളിയം സഹമന്ത്രി സുരേഷ് ഗോപിയാണ് പുതിയ തീരുമാനം അറിയിച്ചത്. പശ്ചിമേഷ്യൻ സംഘർഷത്തിന്റെ പശ്ചാത്തലത്തിൽ എൽപിജി വിതരണത്തിൽ സമ്മർദം നേരിട്ടതിനെ തുടർന്ന് നഗരപ്രദേശങ്ങളിൽ 25 ദിവസവും ഗ്രാമപ്രദേശങ്ങളിൽ 45 ദിവസവുമായിരുന്നു റീഫിൽ ബുക്കിങ്ങിനുള്ള ഇടവേള. എന്നാൽ നിലവിൽ രാജ്യത്തെ എൽപിജി വിതരണം മെച്ചപ്പെട്ടതായും സിലിണ്ടർ ലഭിക്കുന്നതിനുള്ള ബാക്ക്‌ലോഗ് ഗണ്യമായി കുറഞ്ഞതായും കേന്ദ്രം വിലയിരുത്തി. ഇതിന്റെ അടിസ്ഥാനത്തിലാണ് ഗ്രാമപ്രദേശങ്ങളിൽ നിലവിലുണ്ടായിരുന്ന 45 ദിവസത്തെ നിയന്ത്രണം ഒഴിവാക്കി 25 ദിവസമാക്കിയത്. ഇതോടെ രാജ്യത്തെ എല്ലാ ഗാർഹിക എൽപിജി ഉപഭോക്താക്കൾക്കും ഒരേ ബുക്കിങ് ഇടവേളയായിരിക്കും ബാധകമാകുക. കൂടുതൽ ഇടയ്ക്കിടെ സിലിണ്ടർ ആവശ്യമായി വരുന്ന കുടുംബങ്ങൾക്ക് പുതിയ തീരുമാനം പ്രത്യേക ആശ്വാസമാകും. പശ്ചിമേഷ്യൻ സംഘർഷത്തെ തുടർന്നുണ്ടായ വിതരണ പ്രതിസന്ധിയിൽ നേരത്തെ എൽപിജി ലഭ്യതയിൽ വലിയ സമ്മർദമുണ്ടായിരുന്നു. വിതരണം നിയന്ത്രിക്കുന്നതിന്റെ ഭാഗമായി റീഫിൽ ബുക്കിങ്ങിനുള്ള ഇടവേള 21 ദിവസത്തിൽ നിന്ന് നഗരങ്ങളിൽ 25 ദിവസവും ഗ്രാമങ്ങളിൽ 45 ദിവസവുമായി ഉയർത്തിയിരുന്നു. പുതിയ തീരുമാനം: - നഗരപ്രദേശങ്ങൾ – 25 ദിവസം - ഗ്രാമപ്രദേശങ്ങൾ – 25 ദിവസം - ഗ്രാമപ്രദേശങ്ങളിലെ പഴയ 45 ദിവസത്തെ ഇടവേള ഒഴിവാക്കി - എല്ലാ ഗാർഹിക ഉപഭോക്താക്കൾക്കും ഇനി ഒരേ ബുക്കിങ് മാനദണ്ഡം