തിരുവനന്തപുരം: പ്രിയദർശിനി സൗജന്യ യാത്രാ പദ്ധതി 100 ദിവസം പൂർത്തിയാക്കുന്നതിന്റെ ഭാഗമായി കെഎസ്ആർടിസി വനിതകൾക്ക് സൗജന്യ സാരി വിതരണം ചെയ്യുമെന്ന പ്രചാരണം വ്യാജമെന്ന് കെഎസ്ആർടിസി. എല്ലാ ജില്ലകളിലെയും ഡിപ്പോകൾ കേന്ദ്രീകരിച്ച് സാരി വിതരണം നടത്തുമെന്നും തിരുവനന്തപുരം തമ്പാനൂരിൽ ഗതാഗത മന്ത്രി സി.പി. ജോൺ ഉദ്ഘാടനം ചെയ്യുമെന്നുമായിരുന്നു പ്രചരിച്ച വിവരം.
എന്നാൽ ഇത്തരമൊരു സാരി വിതരണ പരിപാടിക്ക് നിർദേശമില്ലെന്ന് കെഎസ്ആർടിസി സിഎംഡി ഡോ. പി.എസ്. പ്രമോജ് ശങ്കർ വ്യക്തമാക്കി. പ്രിയദർശിനി പദ്ധതിയുടെ 100-ാം ദിനാഘോഷത്തിന്റെ ഭാഗമായി ആഘോഷപരിപാടികൾ മാത്രമാണ് നടത്താൻ തീരുമാനിച്ചിട്ടുള്ളതെന്നും അദ്ദേഹം അറിയിച്ചു.
വ്യാജവാർത്ത പ്രചരിച്ചതിൽ ഗതാഗത മന്ത്രി സി.പി. ജോൺ കെഎസ്ആർടിസി എംഡിയോട് ഉൾപ്പെടെ കടുത്ത അതൃപ്തി രേഖപ്പെടുത്തി. പ്രിയദർശിനി പദ്ധതിയുടെ ശോഭ കെടുത്തുന്ന തരത്തിലുള്ള ഇത്തരം പ്രചാരണം ആരാണ് നടത്തിയതെന്ന് കണ്ടെത്തണമെന്നും മന്ത്രി നിർദേശിച്ചതായി റിപ്പോർട്ടിൽ പറയുന്നു.
സെപ്റ്റംബർ 22നാണ് പ്രിയദർശിനി സൗജന്യ യാത്രാ പദ്ധതി 100 ദിവസം പൂർത്തിയാക്കുന്നത്. ഇതിന്റെ ഭാഗമായി ചൊവ്വാഴ്ച രാവിലെ 10ന് മന്ത്രി തമ്പാനൂർ ഡിപ്പോ സന്ദർശിക്കും. തുടർന്ന് കെഎസ്ആർടിസി ജീവനക്കാർ യാത്രക്കാർക്ക് മധുരം വിതരണം ചെയ്യും.
വൈകിട്ട് 7.30ന് തമ്പാനൂർ ചൈത്രം ഹോട്ടലിൽ നടക്കുന്ന ചടങ്ങിൽ കെഎസ്ആർടിസി ബജറ്റ് ടൂറിസം സെല്ലിന്റെ ലക്ഷദ്വീപ്, ഹൈദരാബാദ് ലക്ഷ്വറി പാക്കേജ് സർവീസുകളും പുതിയ സോഫ്റ്റ്‌വെയറും വെയിറ്റിങ് ലിസ്റ്റ് സംവിധാനവും മന്ത്രി ഉദ്ഘാടനം ചെയ്യും.
ജൂൺ 15 മുതൽ സെപ്റ്റംബർ 19 വരെയുള്ള 97 ദിവസത്തിനിടെ പ്രിയദർശിനി പദ്ധതിയിലൂടെ 12.54 കോടി സൗജന്യ യാത്രകൾ നടന്നതായാണ് കെഎസ്ആർടിസിയുടെ കണക്ക്. ഈ കാലയളവിൽ 266.53 കോടി രൂപയുടെ ടിക്കറ്റുകളാണ് സൗജന്യമായി അനുവദിച്ചത്. പ്രതിദിനം ശരാശരി 12.93 ലക്ഷം പേരാണ് പദ്ധതിയുടെ പ്രയോജനം നേടിയത്.
അതിനാൽ സൗജന്യ സാരി ലഭിക്കുമെന്ന് കരുതി നാളെ കെഎസ്ആർടിസി ഡിപ്പോകളിലേക്ക് എത്തേണ്ടതില്ലെന്ന് അധികൃതർ വ്യക്തമാക്കി.