കൊച്ചി: കൊച്ചി മെട്രോ റെയിൽ ലിമിറ്റഡിന്റെ (കെഎംആർഎൽ) ഔദ്യോഗിക രേഖകളും ജീവനക്കാരുടെ വ്യക്തിഗത വിവരങ്ങളും സാമ്പത്തിക വിവരങ്ങളും അനധികൃതമായി കൈവശപ്പെടുത്തി വാട്‌സാപ്പ് ഗ്രൂപ്പിൽ പ്രചരിപ്പിച്ചെന്ന പരാതിയിൽ കൊച്ചി സിറ്റി പൊലീസ് അന്വേഷണം ആരംഭിച്ചു. കെഎംആർഎൽ നൽകിയ പരാതിയുടെ അടിസ്ഥാനത്തിൽ സെപ്റ്റംബർ 12നാണ് അജ്ഞാതർക്കെതിരെ കേസ് രജിസ്റ്റർ ചെയ്തത്. സംഭവത്തിൽ സൈബർ സംഘത്തിന്റെ സഹായത്തോടെയാണ് അന്വേഷണം പുരോഗമിക്കുന്നത്.
കെഎംആർഎല്ലിന്റെ കലൂർ ജവഹർലാൽ നെഹ്റു സ്റ്റേഡിയം മെട്രോ സ്റ്റേഷൻ കെട്ടിടത്തിലെ കോർപറേറ്റ് ഓഫീസിലാണ് അനധികൃത പ്രവേശനം നടന്നതെന്നാണ് എഫ്ഐആറിലെ ആരോപണം. ഓഫീസിലെ നാലാം നിലയിൽ പ്രവർത്തിക്കുന്ന സംവിധാനങ്ങളിലേക്ക് അനുമതിയില്ലാതെ പ്രവേശിച്ച് ഔദ്യോഗിക വിവരങ്ങൾ കൈവശപ്പെടുത്തിയെന്നാണ് പരാതി.
കെഎംആർഎൽ ഐടി വിഭാഗം ഔദ്യോഗിക രേഖകൾ അച്ചടിക്കാൻ ഉപയോഗിച്ചിരുന്ന കമ്പ്യൂട്ടറും പ്രിന്ററും ദുരുപയോഗം ചെയ്തതായും എഫ്ഐആറിൽ പറയുന്നു. ഇതുവഴി മറ്റ് ഡെസ്ക്ടോപ്പുകളിലേക്കും മൊബൈൽ ഫോണുകളിലേക്കും പ്രവേശനം നേടുകയും വിവരങ്ങൾ ശേഖരിക്കുകയും ചെയ്തെന്നാണ് ആരോപണം. ഔദ്യോഗിക രേഖകൾ കൈമാറുന്നതിനായി മറ്റൊരു ഇ-മെയിൽ അക്കൗണ്ടും ഉപയോഗിച്ചെന്ന വിവരവും അന്വേഷണത്തിന്റെ ഭാഗമാണ്.
വാട്‌സാപ്പ് ഗ്രൂപ്പിൽ രേഖകൾ
ചോർന്നതായി പരാതിയിൽ പറയുന്ന രേഖകൾ ‘Unified Kochi Metro Rail Reform and Development Forum’ എന്ന പേരിലുള്ള വാട്‌സാപ്പ് ഗ്രൂപ്പിലാണ് പ്രചരിച്ചതെന്നാണ് പൊലീസ് കണ്ടെത്തിയിരിക്കുന്നത്. കൊച്ചി മെട്രോയുടെ പദ്ധതികൾ, പ്രവർത്തനം, വികസനം തുടങ്ങിയ വിഷയങ്ങൾ ചർച്ച ചെയ്യുന്നതിനായി രൂപീകരിച്ച ഗ്രൂപ്പാണിത്.
രേഖകൾ എങ്ങനെയാണ് കെഎംആർഎൽ സംവിധാനങ്ങളിൽ നിന്ന് പുറത്തേക്ക് പോയത്, ആരാണ് അവ ശേഖരിച്ചത്, ആദ്യമായി ആരാണ് ഗ്രൂപ്പിൽ പങ്കുവെച്ചത് തുടങ്ങിയ കാര്യങ്ങളാണ് അന്വേഷണത്തിൽ പ്രധാനമായും പരിശോധിക്കുന്നത്. ഗ്രൂപ്പ് നിയന്ത്രിക്കുന്നവരെയും രേഖകൾ പ്രചരിപ്പിച്ചവരെയും ചോദ്യം ചെയ്യാനും പൊലീസ് നീക്കം ആരംഭിച്ചിട്ടുണ്ട്.
സൈബർ ആക്രമണമോ അകത്തുനിന്നുള്ള ചോർച്ചയോ?
സംഭവത്തിന് പിന്നിൽ പുറത്തുനിന്നുള്ള സൈബർ ആക്രമണമാണോ, അതോ കെഎംആർഎൽ സംവിധാനങ്ങളിൽ പ്രവേശനാനുമതിയുള്ള ഒരാളുടെ സഹായത്തോടെയാണോ വിവരങ്ങൾ പുറത്തേക്ക് പോയതെന്നതും പൊലീസ് പരിശോധിക്കുന്നുണ്ട്.
രേഖകളുടെ സ്വഭാവവും അവ ലഭിച്ച രീതിയും കണക്കിലെടുത്ത് ആഭ്യന്തര ഇടപെടലിനുള്ള സാധ്യതയും അന്വേഷണസംഘം പരിശോധിക്കുന്നുണ്ട്. എന്നാൽ ആരുടെയെങ്കിലും പങ്കാളിത്തം ഇതുവരെ പൊലീസ് സ്ഥിരീകരിച്ചിട്ടില്ല. സാങ്കേതിക പരിശോധനകളും ബന്ധപ്പെട്ട ജീവനക്കാരുടെ മൊഴിയെടുക്കലും പൂർത്തിയായ ശേഷമേ ഇക്കാര്യത്തിൽ വ്യക്തത വരൂ.
‘സെൻസിറ്റീവ് രേഖകൾ ചോർന്നതായി കണ്ടെത്തിയിട്ടില്ല’
അതേസമയം, വിഷയത്തിൽ പ്രധാനപ്പെട്ടൊരു വിശദീകരണവും പൊലീസ് നൽകിയിട്ടുണ്ട്. നിലവിലെ അന്വേഷണത്തിൽ അത്യന്തം സെൻസിറ്റീവ് രേഖകൾ ചോർന്നതായി സ്ഥിരീകരിച്ചിട്ടില്ലെന്നാണ് ഒരു മുതിർന്ന പൊലീസ് ഉദ്യോഗസ്ഥൻ വ്യക്തമാക്കിയത്. ചില രേഖകൾ ചോർന്നതായി സംശയവും പരാതി ലഭിച്ചതുമാണ് നിലവിലുള്ളത്. വിശദമായ പരിശോധന തുടരുകയാണെന്നും സൈബർ സംഘം വിവരങ്ങൾ എങ്ങനെ പുറത്തേക്ക് പോയെന്ന് പരിശോധിക്കുകയാണെന്നും പൊലീസ് അറിയിച്ചു.
കെഎംആർഎൽ ഓഫീസിലെ കമ്പ്യൂട്ടർ സംവിധാനങ്ങളും മറ്റ് ഉപകരണങ്ങളും പരിശോധിക്കാനും ഐടി വിഭാഗത്തിലെയും കരാർ അടിസ്ഥാനത്തിൽ ജോലി ചെയ്യുന്ന സാങ്കേതിക ജീവനക്കാരിലെയും മൊഴിയെടുക്കാനും അന്വേഷണസംഘം നീക്കം നടത്തുന്നുണ്ട്.
സംഭവം കെഎംആർഎല്ലിന്റെ ഔദ്യോഗിക വിവരങ്ങളുടെ സുരക്ഷയ്ക്കും ജീവനക്കാരുടെ സ്വകാര്യതയ്ക്കും ഗുരുതരമായ ആശങ്ക ഉയർത്തിയിട്ടുണ്ട്. രേഖകൾ പുറത്തേക്ക് പോയതിന്റെ യഥാർഥ ഉറവിടവും ഇതിന് പിന്നിലുള്ളവരും വ്യക്തമാകുന്നതോടെ മാത്രമേ സംഭവത്തിന്റെ വ്യാപ്തി പൂർണമായി വ്യക്തമാകൂ. അന്വേഷണം തുടരുകയാണ്.