തിരുവനന്തപുരം: സംസ്ഥാനത്തെ വൈദ്യുതി പ്രതിസന്ധിക്കിടെ വൈദ്യുതി വിതരണം വെട്ടിക്കുറയ്ക്കാൻ തീരുമാനിച്ചിട്ടില്ലെന്ന് വൈദ്യുതി മന്ത്രി സണ്ണി ജോസഫ്. സംസ്ഥാനത്തിന്റെ ആവശ്യകത നിറവേറ്റുന്നതിനായി ലഭ്യമായ എല്ലാ മാർഗങ്ങളിലൂടെയും വൈദ്യുതി വാങ്ങാനുള്ള നടപടികളാണ് സ്വീകരിക്കുന്നതെന്നും മന്ത്രി വ്യക്തമാക്കി.
വൈദ്യുതി ലഭ്യമാകുന്ന എല്ലാ സ്രോതസ്സുകളും പരമാവധി പ്രയോജനപ്പെടുത്തുകയാണ് സർക്കാരിന്റെ ലക്ഷ്യം. നിലവിലെ സാഹചര്യത്തിൽ വൈദ്യുതി ക്ഷാമം പരിഹരിക്കുന്നതിനായി പുറത്തുനിന്ന് വൈദ്യുതി വാങ്ങുന്നതുൾപ്പെടെയുള്ള നടപടികൾ തുടരുകയാണെന്നും മന്ത്രി പറഞ്ഞു.
കേരളം നേരിടുന്ന വൈദ്യുതി പ്രതിസന്ധിക്ക് നിരവധി കാരണങ്ങളുണ്ട്. മഴയുടെ ലഭ്യത കുറഞ്ഞതിനെ തുടർന്ന് ജലവൈദ്യുതി ഉൽപാദനത്തിൽ കുറവുണ്ടായതും അതേസമയം സംസ്ഥാനത്തെ വൈദ്യുതി ഉപഭോഗം ഗണ്യമായി ഉയർന്നതുമാണ് പ്രധാന വെല്ലുവിളികൾ. കഴിഞ്ഞ മാസങ്ങളിൽ സംസ്ഥാനത്തെ വൈദ്യുതി ഉപയോഗം വലിയ തോതിൽ വർധിച്ചിരുന്നു.
ഇതിന് പുറമെ, വേനൽക്കാലത്ത് മറ്റു സംസ്ഥാനങ്ങളിൽനിന്ന് കടം വാങ്ങിയ വൈദ്യുതി തിരിച്ചുനൽകേണ്ട സാഹചര്യം കൂടി പ്രതിസന്ധിയുടെ ആക്കം കൂട്ടിയിരുന്നു. വൈദ്യുതി വിപണിയിലെ വിലക്കയറ്റവും ആഭ്യന്തര ഉൽപാദനത്തിലെ കുറവും സ്ഥിതി കൂടുതൽ സങ്കീർണമാക്കി.
കേരളത്തിന്റെ ദീർഘകാല വൈദ്യുതി ആവശ്യകത പരിഹരിക്കുന്നതിനുള്ള കരാർ റദ്ദാക്കിയതും ഇപ്പോഴത്തെ പ്രതിസന്ധിയുടെ പ്രധാന കാരണങ്ങളിലൊന്നാണെന്നാണ് മന്ത്രി നേരത്തെ വ്യക്തമാക്കിയിരുന്നത്. യൂണിറ്റിന് ഏകദേശം 4.29 രൂപ നിരക്കിൽ ലഭിക്കുമായിരുന്ന ദീർഘകാല വൈദ്യുതി കരാർ റദ്ദാക്കിയതിന്റെ പ്രത്യാഘാതമാണ് ഇപ്പോൾ അനുഭവിക്കുന്നതെന്നായിരുന്നു സണ്ണി ജോസഫിന്റെ വാദം.
അതേസമയം, മഴ ലഭിക്കുന്നതോടെ ജലസംഭരണികളിലെ ജലനിരപ്പ് ഉയരുകയും ആഭ്യന്തര വൈദ്യുതി ഉൽപാദനം മെച്ചപ്പെടുകയും ചെയ്യുമെന്ന പ്രതീക്ഷയും നിലനിൽക്കുന്നുണ്ട്. മഴ ലഭിച്ചതോടെ പ്രതിസന്ധി പരിഹരിക്കുന്നതിനുള്ള സാഹചര്യം മെച്ചപ്പെടുകയാണെന്ന് മന്ത്രി നേരത്തെയും വ്യക്തമാക്കിയിരുന്നു.
വൈദ്യുതി പ്രതിസന്ധിയുടെ പശ്ചാത്തലത്തിൽ അനാവശ്യ വൈദ്യുതി ഉപയോഗം കുറയ്ക്കണമെന്നും മന്ത്രി നേരത്തെ പൊതുജനങ്ങളോട് അഭ്യർഥിച്ചിരുന്നു. എ.സി. 25 ഡിഗ്രിയിൽ ക്രമീകരിക്കുക, രാത്രി സമയത്തെ ഇസ്തിരിപ്പെട്ടി, മോട്ടോർ തുടങ്ങിയവയുടെ ഉപയോഗം പരമാവധി ഒഴിവാക്കുക, അനാവശ്യ ലൈറ്റുകൾ അണയ്ക്കുക തുടങ്ങിയ നിർദേശങ്ങളും നൽകിയിരുന്നു.