മോക്കി (ചൈന): ജൂനിയർ വനിതാ ഏഷ്യാകപ്പ് ഹോക്കി ക്വാർട്ടർ ഫൈനലിൽ പാക്കിസ്ഥാനെ ഗോൾമഴയിൽ മുക്കി ഇന്ത്യ. ഏകപക്ഷീയമായ മത്സരത്തിൽ 19-0നാണ് നിലവിലെ ചാമ്പ്യൻമാരായ ഇന്ത്യയുടെ തകർപ്പൻ ജയം. ഇതോടെ ഇന്ത്യ ടൂർണമെന്റിന്റെ സെമിഫൈനലിൽ പ്രവേശിച്ചു.
തുടക്കം മുതൽ ആക്രമണാത്മകമായാണ് ഇന്ത്യൻ താരങ്ങൾ കളിച്ചത്. ഏഴാം മിനിറ്റിൽ ലഭിച്ച പെനാൽറ്റി കോർണർ പൂജ സാഹു ഗോളാക്കി മാറ്റിയതോടെയാണ് ഇന്ത്യയുടെ ഗോൾവേട്ടയ്ക്ക് തുടക്കമായത്. ആദ്യ പകുതി അവസാനിക്കുമ്പോഴേക്കും ഇന്ത്യ 10-0ന്റെ ലീഡ് സ്വന്തമാക്കിയിരുന്നു. രണ്ടാം പകുതിയിൽ ഒൻപത് ഗോളുകൾ കൂടി നേടിയ ഇന്ത്യ പാക്കിസ്ഥാനെ പൂർണമായും പ്രതിരോധത്തിലാക്കി.
റോഷ്നി ഐൻഡ്, സനിക ചന്ദ്രകാന്ത് മാനെ, മധു സിദർ, പൂജ മാലിക്ക്, സുപ്രിയ എന്നിവർ ഇന്ത്യയ്ക്കായി ഒന്നിലധികം ഗോളുകൾ നേടി. പൂജ മാലിക്ക് മൂന്ന് ഗോളുകളുമായി ഹാട്രിക് സ്വന്തമാക്കിയപ്പോൾ സനിക മാനെ, മധു സിദർ, സുപ്രിയ എന്നിവർ രണ്ട് വീതം ഗോളുകൾ നേടി. മത്സരത്തിൽ ഇന്ത്യയ്ക്കായി ആകെ 13 താരങ്ങളാണ് ഗോൾ നേടിയത്.
മത്സരത്തിൽ ഇന്ത്യക്ക് 18 പെനാൽറ്റി കോർണറുകളും ഒരു പെനാൽറ്റി സ്ട്രോക്കും ലഭിച്ചു. മറുവശത്ത് ഒരു പെനാൽറ്റി കോർണറോ പെനാൽറ്റി സ്ട്രോക്കോ പോലും സ്വന്തമാക്കാൻ പാക്കിസ്ഥാനായില്ല. നാല് ക്വാർട്ടറുകളിലും ഇന്ത്യ ആധിപത്യം നിലനിർത്തി—ആദ്യ ക്വാർട്ടറിൽ അഞ്ച്, രണ്ടാം ക്വാർട്ടറിൽ അഞ്ച്, മൂന്നാം ക്വാർട്ടറിൽ മൂന്ന്, അവസാന ക്വാർട്ടറിൽ ആറ് ഗോളുകൾ.
ഗ്രൂപ്പ് ഘട്ടത്തിലും ഇന്ത്യ മികച്ച പ്രകടനമാണ് നടത്തിയത്. ജപ്പാൻ, മലേഷ്യ, ദക്ഷിണ കൊറിയ ടീമുകളെ തോൽപ്പിച്ച ഇന്ത്യ ചൈനയ്ക്കെതിരായ മത്സരം ഗോൾരഹിത സമനിലയിൽ അവസാനിപ്പിച്ചാണ് ഗ്രൂപ്പിൽ ഒന്നാമതെത്തിയത്.
ടൂർണമെന്റിൽ തുടർച്ചയായ മൂന്നാം ഫൈനൽ ലക്ഷ്യമിടുന്ന ഇന്ത്യയുടെ സെമിഫൈനൽ പോരാട്ടം ശനിയാഴ്ച നടക്കും. ദക്ഷിണ കൊറിയ–മലേഷ്യ മത്സരത്തിലെ വിജയികളെയാണ് ഇന്ത്യ സെമിയിൽ നേരിടുക. 2023ലും 2024ലും കിരീടം നേടിയ ഇന്ത്യ തുടർച്ചയായ മൂന്നാം കിരീടമാണ് ലക്ഷ്യമിടുന്നത്.