മുംബൈ: പുതിയ തലമുറയെ, പ്രത്യേകിച്ച് 'ജെൻ സി' (Gen Z) യുവാക്കളെ പൂർണമായി വിശ്വസിക്കുന്നുവെന്നും പ്രതിഷേധങ്ങളിൽ പങ്കെടുത്തുവെന്ന കാരണത്താൽ മാത്രം അവരെ രാജ്യദ്രോഹികളായി മുദ്രകുത്താൻ പാടില്ലെന്നും ആർ.എസ്.എസ്. സർസംഘചാലക് മോഹൻ ഭാഗവത് പറഞ്ഞു.
മുംബൈയിൽ നടന്ന 'ഇന്ത്യ ഇന്റർനാഷണൽ മൂവ്മെന്റ് ടു യുണൈറ്റ് നേഷൻസ്' പരിപാടിയിൽ വിദ്യാർത്ഥികളോട് സംസാരിക്കവെയാണ് അദ്ദേഹം ഇക്കാര്യം വ്യക്തമാക്കിയത്. ജനാധിപത്യ സംവിധാനത്തിൽ ചോദ്യങ്ങൾ ചോദിക്കാനും മാറ്റങ്ങൾ ആവശ്യപ്പെടാനും യുവാക്കൾക്ക് പൂർണ അവകാശമുണ്ടെന്നും അദ്ദേഹം പറഞ്ഞു.
പഴയ തലമുറ അധികാരകേന്ദ്രങ്ങളെ ചോദ്യം ചെയ്യുന്നതിൽ മടിച്ചിരുന്നെങ്കിൽ, ഇന്നത്തെ യുവതലമുറ യുക്തിപരമായ ഉത്തരങ്ങൾ തേടുകയും തുറന്ന് ചോദ്യങ്ങൾ ഉയർത്തുകയും ചെയ്യുന്നവരാണെന്ന് ഭാഗവത് അഭിപ്രായപ്പെട്ടു. 'ജെൻ സി'യും 'ജെൻ ആൽഫ'യും കാര്യങ്ങളെ സ്നേഹത്തോടെയും അനുകമ്പയോടെയും സമീപിക്കുന്നവരാണെന്നും അദ്ദേഹം കൂട്ടിച്ചേർത്തു.
"ജെൻ സി ഏതെങ്കിലും പ്രതിഷേധത്തിൽ പങ്കെടുത്തുവെന്നു കരുതി അവർ രാജ്യദ്രോഹികളാകുന്നില്ല. അവർ നമ്മുടെ അടുത്ത തലമുറയാണ്. പരസ്പരം അംഗീകരിക്കുകയും ബഹുമാനിക്കുകയും ചെയ്യുമ്പോൾ മാത്രമേ അവരുടെ ആശങ്കകൾ മനസ്സിലാക്കാൻ സാധിക്കൂ. പുതിയ തലമുറ കൂടുതൽ സത്യസന്ധരാണ്. അവർക്ക് ഈ രാജ്യത്തോട് ആത്മാർത്ഥതയുണ്ട്. ദേശഭക്തിയും സേവനത്തിനുള്ള പ്രതിബദ്ധതയും അവരിലുണ്ട്," — മോഹൻ ഭാഗവത് പറഞ്ഞു.
ഡൽഹിയിലെ ജന്തർ മന്തറിൽ പോലീസും പ്രതിഷേധക്കാരും തമ്മിലുണ്ടായ ഏറ്റുമുട്ടലിന്റെ വസ്തുതകൾ തനിക്ക് വ്യക്തമായി അറിയില്ലെന്നും, എന്നാൽ പുതിയ തലമുറയെ താൻ "കണ്ണടച്ച് വിശ്വസിക്കാം" എന്ന നിലപാടിലാണ് എന്നും അദ്ദേഹം വ്യക്തമാക്കി. യുവാക്കളുടെ അഭിപ്രായങ്ങളും ആശങ്കകളും കേൾക്കുകയും അവരെ മനസ്സിലാക്കാൻ ശ്രമിക്കുകയും ചെയ്യേണ്ടത് സമൂഹത്തിന്റെ ഉത്തരവാദിത്വമാണെന്നും അദ്ദേഹം അഭിപ്രായപ്പെട്ടു.