കൊച്ചി: കേരള പൊലീസിന്റെ ഓപ്പറേഷൻ തൂഫാൻ അന്വേഷണത്തിന് പിന്നാലെ ലഹരിക്കടത്തിന് പിന്നിലെ സാമ്പത്തിക ഇടപാടുകളിലേക്ക് എൻഫോഴ്സ്മെന്റ് ഡയറക്ടറേറ്റും (ED) അന്വേഷണം വ്യാപിപ്പിച്ചു. തായ്‌ലൻഡിൽനിന്ന് കേരളത്തിലേക്ക് എത്തിച്ച കോടികൾ വിലമതിക്കുന്ന ഹൈബ്രിഡ് കഞ്ചാവ് പിടികൂടിയ കേസിന്റെ തുടർ അന്വേഷണത്തിലാണ് ഇഡി രംഗത്തെത്തിയത്. കോഴിക്കോട്, പാലക്കാട് ജില്ലകളിലെ നാല് ഇടങ്ങളിലാണ് വ്യാഴാഴ്ച ഇഡി പരിശോധന നടത്തുന്നത്.
ലഹരിമരുന്ന് വിൽപ്പനയിലൂടെ ലഭിച്ച പണം എവിടേക്കാണ് ഒഴുകിയതെന്നും പണം ഹവാല മാർഗങ്ങളിലൂടെ കൈമാറിയിട്ടുണ്ടോയെന്നും റിയൽ എസ്റ്റേറ്റ് ഇടപാടുകളിലോ ബിനാമി സ്വത്തുകളിലോ നിക്ഷേപിച്ചിട്ടുണ്ടോയെന്നുമാണ് ഇഡി പരിശോധിക്കുന്നത്. സംസ്ഥാന പൊലീസ് രജിസ്റ്റർ ചെയ്ത എഫ്‌ഐആറിന്റെ അടിസ്ഥാനത്തിൽ പ്രത്യേക എൻഫോഴ്സ്മെന്റ് കേസ് ഇൻഫർമേഷൻ റിപ്പോർട്ട് (ECIR) രജിസ്റ്റർ ചെയ്താണ് അന്വേഷണം ആരംഭിച്ചിരിക്കുന്നത്.
തുടക്കം 16.50 കിലോ ഹൈബ്രിഡ് കഞ്ചാവിൽ
കഴിഞ്ഞ ജൂണിൽ വൈപ്പിനിൽ വാഹന പരിശോധനയ്ക്കിടെ 1.16 കിലോ ഹൈബ്രിഡ് കഞ്ചാവുമായി ആയുഷ് എന്നയാളെ പൊലീസ് പിടികൂടിയതോടെയാണ് കേസിന്റെ നിർണായക കണ്ണികൾ പുറത്തുവന്നത്. ഇയാളെ ചോദ്യം ചെയ്തതിനെ തുടർന്ന് പെരുമ്പാവൂർ തെക്കുംഭാഗത്തെ വാടക ഫ്ലാറ്റിൽ നടത്തിയ പരിശോധനയിൽ 16.50 കിലോ ഹൈബ്രിഡ് കഞ്ചാവ് കൂടി പിടികൂടി. ആയുഷിന്റെ ഭാര്യ അനികയ്ക്കും ലഹരി ഇടപാടിൽ പങ്കുണ്ടെന്ന് കണ്ടെത്തിയതോടെ ഇരുവരെയും അറസ്റ്റ് ചെയ്തു.
തുടർ അന്വേഷണത്തിലാണ് തായ്‌ലൻഡിൽനിന്ന് വിവിധ കാരിയർമാർ വഴി നെടുമ്പാശേരി വിമാനത്താവളത്തിലെത്തിക്കുന്ന ഹൈബ്രിഡ് കഞ്ചാവ് സംസ്ഥാനത്തിന്റെ വിവിധ ഭാഗങ്ങളിലേക്ക് വിതരണം ചെയ്യുന്ന ശൃംഖലയെക്കുറിച്ച് പൊലീസിന് വിവരം ലഭിച്ചത്. വിതരണക്കാർ, മൊത്തവിതരണക്കാർ, ചെറുകിട വിൽപ്പനക്കാർ തുടങ്ങി പലതട്ടുകളിലായി പ്രവർത്തിക്കുന്ന സംഘത്തെക്കുറിച്ചാണ് അന്വേഷണം പുരോഗമിക്കുന്നത്.
കോഴിക്കോട് വീടുകളിൽ പരിശോധന
കോഴിക്കോട് എരഞ്ഞിപ്പാലത്തെ ജഗത്തിന്റെ വീട്ടിലും ബാലുശ്ശേരി ഉണ്ണികുളം എസ്റ്റേറ്റ് മുക്കിലെ ജയ്സലിന്റെ വീട്ടിലുമാണ് ഇഡി പരിശോധന നടത്തുന്നത്. സിആർപിഎഫ് സുരക്ഷയിലാണ് റെയ്ഡ്. ജഗത്തിന്റെ വീട്ടിൽ അമ്മ മാത്രവും ജയ്സലിന്റെ വീട്ടിൽ ഭാര്യയും മക്കളുമാണ് ഉണ്ടായിരുന്നതെന്ന് റിപ്പോർട്ടുകൾ പറയുന്നു.
തായ്‌ലൻഡിൽനിന്ന് ഹൈബ്രിഡ് കഞ്ചാവ് എത്തിക്കുന്നതിലെ പ്രധാന കണ്ണികളിലൊരാളാണ് ജയ്സലെന്നാണ് അന്വേഷണ സംഘത്തിന്റെ നിഗമനം. ഇയാളെ ഇതുവരെ പിടികൂടാനായിട്ടില്ലെന്നും റിപ്പോർട്ടുണ്ട്.
രാജ്യാന്തര പണമിടപാടുകളിലേക്ക് അന്വേഷണം
പെരുമ്പാവൂർ കേസിന്റെ തുടർ അന്വേഷണത്തിൽ പുറത്തുവന്നത് ലഹരിക്കടത്ത് മാത്രമല്ല, അതിന് പിന്നിലെ വലിയ സാമ്പത്തിക ശൃംഖലയെക്കുറിച്ചുള്ള വിവരങ്ങളാണെന്നാണ് റിപ്പോർട്ട്. ഇതോടെയാണ് സാധാരണ ലഹരി കേസിൽനിന്ന് അന്വേഷണം കള്ളപ്പണം വെളുപ്പിക്കൽ, ഹവാല, അനധികൃത നിക്ഷേപങ്ങൾ എന്നിവയിലേക്ക് മാറുന്നത്.
എൻഡിപിഎസ് നിയമപ്രകാരം രജിസ്റ്റർ ചെയ്ത ഒരു കേസിന്റെ സാമ്പത്തിക ഇടപാടുകളിലേക്ക് ഇഡി ഇടപെടുന്നത് കേരളത്തിൽ അപൂർവമാണെന്നും റിപ്പോർട്ടുകൾ ചൂണ്ടിക്കാട്ടുന്നു. ലഹരിക്കടത്തിലൂടെ സമ്പാദിച്ച പണം രാജ്യാന്തരതലത്തിൽ കൈമാറ്റം ചെയ്തിട്ടുണ്ടോ, ആ പണം ഉപയോഗിച്ച് സ്വത്തുക്കൾ വാങ്ങിയിട്ടുണ്ടോ തുടങ്ങിയ കാര്യങ്ങളിലാണ് ഇനി അന്വേഷണം കേന്ദ്രീകരിക്കുക.
ഓപ്പറേഷൻ തൂഫാന്റെ വ്യാപ്തി
സംസ്ഥാനത്തെ ലഹരിവിരുദ്ധ നടപടികൾ ശക്തമാക്കുന്നതിന്റെ ഭാഗമായി ആരംഭിച്ച ഓപ്പറേഷൻ തൂഫാന്റെ ഭാഗമായി ഇതിനകം 10,725 പേരെ അറസ്റ്റ് ചെയ്തതായും 9,935 കേസുകൾ രജിസ്റ്റർ ചെയ്തതായും ഏറ്റവും പുതിയ കണക്കുകൾ വ്യക്തമാക്കുന്നു. 21.4 കിലോഗ്രാമിലധികം എംഡിഎംഎ, 1,154 കിലോഗ്രാമിലധികം കഞ്ചാവ്, 4.7 കിലോഗ്രാമിലധികം ഹാഷിഷ് ഓയിൽ, 524 ഗ്രാമിലധികം ഹെറോയിൻ എന്നിവ പിടിച്ചെടുത്തിട്ടുണ്ട്.
ഇതോടെ ഓപ്പറേഷൻ തൂഫാൻ വെറും ലഹരി വേട്ടയിൽ ഒതുങ്ങാതെ ലഹരിയുടെ വിതരണ ശൃംഖലയും അതിന് പിന്നിലെ സാമ്പത്തിക അടിത്തറയും ലക്ഷ്യമിടുന്ന അന്വേഷണമായി മാറുകയാണ്. പെരുമ്പാവൂരിൽ പിടികൂടിയ ഹൈബ്രിഡ് കഞ്ചാവിന്റെ ഉറവിടത്തിൽനിന്ന് തുടങ്ങിയ അന്വേഷണം ഇനി പണത്തിന്റെ വഴിയിലേക്കാണ് നീളുന്നത്.