ന്യൂഡൽഹി:രാജ്യത്തെ കാർഷിക മേഖലയിൽ ആർട്ടിഫിഷ്യൽ ഇന്റലിജൻസിന്റെ (എഐ) സാധ്യതകൾ പ്രയോജനപ്പെടുത്തി കർഷകരുടെ ഉൽപ്പാദനക്ഷമതയും വരുമാനവും ഉയർത്താനുള്ള ശ്രമങ്ങൾ വ്യാപകമാകുന്നു. വിവിധ ഡിജിറ്റൽ കാർഷിക സംവിധാനങ്ങളിലൂടെ രാജ്യത്തെ 12 സംസ്ഥാനങ്ങളിലായി ഏകദേശം 18 ലക്ഷം കർഷകർക്ക് എഐ അധിഷ്ഠിത സേവനങ്ങളുടെ പ്രയോജനം ലഭിച്ചതായാണ് കണക്കുകൾ വ്യക്തമാക്കുന്നത്.
കാലാവസ്ഥ, മണ്ണിന്റെ ഘടന, വിളയുടെ വളർച്ച, കീടബാധ, വിപണി സാഹചര്യം തുടങ്ങിയ വിവരങ്ങൾ വിശകലനം ചെയ്ത് കർഷകർക്ക് കൂടുതൽ കൃത്യമായ തീരുമാനങ്ങളെടുക്കാൻ സഹായിക്കുന്നതാണ് ഇത്തരം സാങ്കേതികവിദ്യകളുടെ പ്രധാന ലക്ഷ്യം.
എഐ അധിഷ്ഠിത കാർഷിക സംവിധാനങ്ങളിൽ വിളകളിലെ രോഗങ്ങളും കീടബാധയും ചിത്രങ്ങളുടെ സഹായത്തോടെ തിരിച്ചറിയൽ, പ്രാദേശിക സാഹചര്യങ്ങൾക്കനുസരിച്ചുള്ള വിള നിർദേശങ്ങൾ, കാലാവസ്ഥാ മുന്നറിയിപ്പുകൾ, വളപ്രയോഗവും ജലസേചനവും സംബന്ധിച്ച നിർദേശങ്ങൾ, വിപണി വിവരങ്ങൾ തുടങ്ങിയ സേവനങ്ങൾ ഉൾപ്പെടുന്നു.
രാജ്യത്ത് ഡിജിറ്റൽ കാർഷിക അടിസ്ഥാനസൗകര്യങ്ങൾ വികസിപ്പിക്കുന്നതിനൊപ്പം സ്വകാര്യ മേഖലയിലെ അഗ്രിടെക് സംവിധാനങ്ങളും കർഷകരിലേക്ക് എഐ സേവനങ്ങൾ എത്തിക്കുന്നുണ്ട്. ഉദാഹരണമായി, ഐടിസിയുടെ ഐടിസി മാ‍ഴ്‌സ് പ്ലാറ്റ്‌ഫോം എഐ/എംഎൽ അധിഷ്ഠിത വ്യക്തിഗത കാർഷിക നിർദേശങ്ങളും സാറ്റലൈറ്റ് ഡാറ്റയും ശബ്ദാധിഷ്ഠിത എഐ സഹായവും ഉൾപ്പെടുന്ന സേവനങ്ങൾ നൽകുന്നുണ്ട്.
വാരണാസിയിൽ നടത്തിയ ഒരു പദ്ധതിയിൽ എഐ/എംഎൽ അധിഷ്ഠിത പ്രാദേശിക വിള നിർദേശങ്ങൾ 27,000ത്തിലധികം ഗോതമ്പ് കർഷകരിലേക്കും 39,000 ഏക്കർ കൃഷിയിടങ്ങളിലേക്കും എത്തിച്ചതായി ഐടിസി വ്യക്തമാക്കിയിട്ടുണ്ട്. കമ്പനിയുടെ കണക്കുപ്രകാരം, വ്യക്തിഗത നിർദേശങ്ങൾ സ്വീകരിച്ച കർഷകരിൽ വിളവിൽ ഏകദേശം 15 ശതമാനവും അറ്റവരുമാനത്തിൽ ഏകദേശം 30 ശതമാനവും വർധന രേഖപ്പെടുത്തി.
അതേസമയം, എഐ മാത്രം ഉപയോഗിക്കുന്നതിലുപരി ഡിജിറ്റൽ സേവനങ്ങൾ, സാറ്റലൈറ്റ് നിരീക്ഷണം, ഡ്രോൺ അധിഷ്ഠിത കൃഷി, കാലാവസ്ഥാ വിവരങ്ങൾ, വിപണി ബന്ധം എന്നിവയെ ഒരുമിച്ച് പ്രയോജനപ്പെടുത്തുന്ന രീതിയിലേക്കാണ് ഇന്ത്യൻ കാർഷിക മേഖല നീങ്ങുന്നത്.
കർഷകർക്ക് കൃഷിച്ചെലവ് കുറയ്ക്കാനും വിളനഷ്ടം നിയന്ത്രിക്കാനും വിപണി തീരുമാനങ്ങൾ കൂടുതൽ കൃത്യമാക്കാനും കഴിയുന്ന തരത്തിൽ സാങ്കേതികവിദ്യയെ ഉപയോഗപ്പെടുത്താനായാൽ, പരമ്പരാഗത കൃഷിരീതികൾക്ക് പുതിയൊരു ഡിജിറ്റൽ പിന്തുണ ലഭിക്കുമെന്നാണ് ഈ പദ്ധതികളുടെ ലക്ഷ്യം.